Чӑваш Енри суд приставӗсем икӗ ҫул каяллах леш тӗнчене ӑсаннӑ ҫынтан парӑм шыраса илме ӗмӗтленнӗ. Тӗрӗсрех каласан, исполнительнӑй производствӑна чарса лартман.
Кӑлтӑка Етӗрне районӗнчи прокуратура тупса палӑртнӑ. Надзор органӗнче тӑрӑшакансем вилнӗ ҫынпа ҫыхӑннӑ ӗҫ районти суд приставӗсем патӗнче пулнине тупса палӑртнӑ. Куҫне икӗ ҫул каяллах хупнӑ ҫыннӑн парӑмне татма тивӗҫ ҫывӑх ҫыннисем пулман.
Ҫавӑн хыҫҫӑн прокуратура Федерацин айӑплава пурнӑҫа кӗртессипе ӗҫлекен службин Чӑваш Енри управленийӗн ертӳҫи ячӗпе асӑрхаттару хучӗ шӑрҫаланӑ.
"Россия 1" телеканалпа пыракан "Привет, Андрей!" телекӑларӑма Чӑваш Ен ҫынни хутшӑннӑ. Паян экран ҫинче Етӗрне районӗнче ҫуралса ӳснӗ Ирина Шоркинӑна курма май пулнӑ.
Хальхи вӑхӑтра вӑл Мускаври "Москонцертра" ӗҫлет. Ирина Шоркина эфирта ашшӗн юратнӑ юррине, чӑвашлине, юрланӑ. Станислав Садальский вӑл хитре юрланине палӑртса "Чӑваш Ен кеверӗ" тенӗ.
Юрӑҫ Етӗрне районӗнчи хурамалсене, ентешӗсене, пысӑк салам каланӑ.
Мускавра Ҫӗнӗ ҫул чӑрӑшне вырнаҫтарнӑ. Ӑна виҫҫӗмӗш ҫул ӗнтӗ Чӑваш Енри ҫынсем лартаҫҫӗ.
Ку ӗҫе хутшӑнакансем - Етӗрне районӗн арҫыннисем: Иван Жержен, Алексей Баклаков, Сергей Мурзин, Алексей Мурзин, Павел Пугачев, Сергей, Владимир тата Станислав Мокеевсем. Тепри Шупашкартан: Павел Павлов.
Кӑҫал каснӑ чӑрӑш 95 ҫулта. Вӑл 27 метр ҫӳллӗш.
Паян ирхи 7 сехет валли республикӑра 12 муниципалитетри 79 ял ҫутӑсӑр пулнӑ: Вӑрнар, Канаш, Йӗпреҫ, Куславкка, Хӗрлӗ Чутай, Сӗнтӗрвӑрри, Муркаш, Вӑрмар, Ҫӗрпӳ, Шӑмӑршӑ, Ҫӗмӗрле, Етӗрне районӗсем.
Аса илтерер: шӑматкун каҫхине пӑрлӑ ҫумӑра пула 17 муниципалитетра электроэнерги сӳннӗ. Раштавӑн 12-мӗшӗ тӗлне 214 ялти 55 пин ҫын ҫутӑсӑр ларнӑ. Бригадӑсем талӑкӗпех ӗҫлеҫҫӗ. Хамӑраннисем ӗлкӗрейменрен кӳршӗ регионсенчен те специалистсене чӗннӗ.
Хальхи вӑхӑтра энергетиксен 72 бригади ӗҫлет. Пӗтӗмпе – 235 специалист, 92 техника.
Етӗрне районӗн администраци пуҫлӑхӗн ҫумӗ тӗлӗшпе пуҫиле ӗҫ пуҫарнӑ. Ҫав ҫынна ӗҫ вырӑнӗпе усӑ курса улталанӑ тесе шухӑшлаҫҫӗ.
Тӗпчевҫӗсем шухӑшланӑ тӑрӑх, кӑҫалхи пуш уйӑхӗнче Етӗрне районӗн администрацийӗ подряд организацийӗпе коммуналлӑ каяшсен свалкине рекультивацилеме килӗшӳ тунӑ.
Ӗҫе пурнӑҫланӑ чухне подряд организацийӗ йӳнӗрех материалсемпе усӑ курнӑ. Ӗҫе йышӑннӑ чухне вара урӑхла кӑтартнӑ. Ҫавна пӗлсе тӑрсах пуҫлӑхӑн заместителӗ документсене алӑ пусса панӑ. Ҫакӑн хыҫҫӑн бюджетран укҫа куҫарса панӑ.
Ӗнер каҫхине 21 сехет те 26 минутра пушарнӑйсем патне Етӗрне районӗнчи Полянки ялӗнче ҫурт ҫунни пирки пӗлтернӗ. Ӑна сӳнтерме 18 ҫӑлавҫӑ, 5 техника ҫитнӗ. Ҫулӑма ҫур ҫӗр иртни 1 сехетре кӑна парӑнтарнӑ.
Пушара сӳнтерсен 1979 ҫулта ҫуралнӑ икӗ арҫыннӑн тата 1983 ҫулхи хӗрарӑмӑн виллисене тупнӑ.
Малтанлӑха пӗлтернӗ тӑрӑх, пушар пирус асӑрханмасӑр туртнине пула тухнӑ.
Чӳк уйӑхӗн 27-мӗшӗнче ҫул-йӗрпе патруль службин ӗҫченӗсем М-7 ҫул ҫинче "Лада Приора" машинӑна чарнӑ. Руль умӗнче Етӗрне районӗн арҫынни, 26 ҫултискер, пулнӑ.
Хайхискерӗн прави суя пулни тӑрӑ шыв ҫине тухнӑ. Инспекторсем документ ҫинчи сӑнӳкерчӗке ҪҪХПИн даннӑйсен базипе танлаштарнӑ та вӗсем урӑхларах пулни палӑрнӑ. Кун хыҫҫӑн водитель хӑй те тунман: вӑл правана тӗнче тетелӗнче укҫалла туяннӑ иккен.
Ку ыйтӑва малалла уҫӑмлатма арҫынна полици уйрӑмне илсе ҫитернӗ.
Паян, чӳк уйӑхӗн 18-мӗшӗнче, чӑваш халӑх артисчӗ Пётр Садовников 50 ҫул тултарнӑ.
Пулас артист 1972 ҫулта Етӗрне районӗнчи Лапракасси ялӗнче ҫуралнӑ. 1993 ҫулта Мускаври М.С. Щепкин ячӗллӗ Аслӑ театр училищинчи (институтӗнчи) чӑваш студийӗнчен вӗренсе тухнӑ.
Мускавран таврӑнсанах вӑл К.В. Иванов ячӗллӗ Чӑваш патшалӑх академи драма театрӗнче ӗҫлеме пуҫланӑ.
Ӗҫтешӗсем тата театр ӳнерне ӑнланакансем Пётр Садовникова нумай енлӗ пултаруллӑ актёр тесе хаклаҫҫӗ. Артист, чӑн та, нумай роль калӑпланӑ. Ҫав шутра — тӗп сӑнарсене те, сцена ҫине самантлӑха тухаканнисене те; драмӑллисенче те вылянӑ, камитсенче те.
Етӗрне районӗн пуҫлӑхӗн пуканне урӑх ҫын йышӑннӑ. Вӑл - Станислав Трофимов. Унччен Станислав Шупашкар хула администрацийӗн ҫамрӑксен тата общество аталанӑвӗн пайӗн пуҫлӑхӗ те пулнӑ. Юлашки вӑхӑтра ЧР Патшалӑх Канашӗн Общество канашӗн председателӗнче вӑй хунӑ.
29 ҫулти ҫамрӑка депутатсем пӗр саслӑн пулса суйланӑ. Станислав Трофимов Красноармейски ялӗнче 1992 ҫулта ҫуралнӑ. Тӑван тӑрӑхӗнче пурӑннӑ чухнех общество ӗҫне хастар хутшӑннӑ. Вӑл - "Пӗрлӗхлӗ Раҫҫей" парти пайташӗ, регионти политканашӗн президиумне кӗрет.
Кӑҫал республикӑра 962 гектар ҫинче пахча ҫимӗҫ лартнӑ. Ку, пӗлтӗрхипе танлаштарсан, 9,9 процент ытларах.
Ҫанталӑк уяр тӑмасть пулсан та хуҫалӑхсенче пахча ҫимӗҫе пухса кӗртес ӗҫ пырать.
Ытларах купӑста, хӗрлӗ кӑшман, кишӗр лартнӑ. Юпа уйӑхӗн 20-мӗшӗ тӗлне пахча ҫимӗҫе 584 гектар ҫинчен пухса кӗртнӗ. Тепӗр 378 гектар ҫинче юлнӑ. Пахча ҫимӗҫе ытларах Муркаш, Куславкка, Етӗрне районӗсенче лартнӑ.
+3.3 °C